2375. 🌺 बोलते व्हा...!

 मनातलं सांगायला शिका, कारण मौनात अनेक नाती हरवतात...
कधी कधी आपण इतकं मनात साठवतो,
की मनच जड होतं.
एखाद्याचं वागणं टोचतं, कुणाचं मौन खुपतं,
कुणाचा कटाक्ष जखम करतो - पण आपण गप्प बसतो.
“नको बोलायला, गैरसमज होईल,” “नको त्रास द्यायला”
असं म्हणत आपण स्वतःलाच थोपवतो...
पण खरं सांगायचं तर -
मौन सगळं सांगत नाही.
कधी कधी एकच शब्द पुरतो -
“मला वाईट वाटलं,” “मला तुझी आठवण येते,”
किंवा “माफ कर, माझ्याकडून चूक झाली.”
हे छोटेसे शब्द नात्यांचं ओझं हलकं करतात.
पण आपण ते शब्द गिळतो.
का बरं?
अहंकार, भीती, की ‘काय वाटेल’ ही चिंता?
पण जेव्हा आपला स्वतःचा माणूस दूर जातो.
तेव्हा कळतं -बोललो असतो तर बरं झालं असतं.
“बोलते व्हा” म्हणजे फक्त बोलबच्चन नव्हे,
तर भावनांना आवाज देणं आहे.
एखाद्याच्या डोळ्यांत पाहून म्हणणं —
“तू माझ्यासाठी खास आहेस,”
किंवा “तू असतोस म्हणून मी आहे,”
इतकंच पुरेसं असतं एखादं नातं पुन्हा फुलवायला.
कधी कधी शांततेपेक्षा संवाद मौल्यवान असतो.
आपल्या शब्दांतून व्यक्त झालेलं प्रेम,
एखाद्याच्या आयुष्यात ऊब पेरून जातं.
कारण नाती जपण्यासाठी शब्दांची ऊब आणि भावनांचा स्पर्श आवश्यक असतो.
वेळ निघून जातो, माणसं पुढे निघून जातात...
पण न बोललेल्या शब्दांची ओढ आयुष्यभर राहते.
मग मन म्हणतं -
“त्या वेळी बोललो असतो तर बरं झालं असतं...”
पण तेव्हा वेळ आणि माणूस  दोघेही हातातून निसटलेले असतात.
म्हणूनच सांगतो 
🌸 बोलते व्हा !
प्रेमाने बोला, हळुवार बोला, पण नक्की बोला. कारण नात्यांना मौन नव्हे,
मनापासूनचा संवादच टिकवतो.

✨ भावनांचा ओलावा जपणारा संवादच नात्यांना जिवंत ठेवतो... म्हणूनच, बोलते व्हा ! 🌹