वडील : कुठे आहेस बाळा?
मुलगी : ऑफिसमध्ये.
वडील : ओके.
मुलगी : काय झालं पप्पा?
वडील : सहजच कॉल केला.
मुलगी : नक्की ना?
वडील : का बरं?
मुलगी : आयुष्यात पहिल्यांदा तुम्ही मला बाळा म्हणालात ना, म्हणून..
वडील : नाही आवडलं?
मुलगी : आवडलं.
वडील : बोलता येईल ना?
मुलगी : हो.
वडील : तुझे सर रागावणार तर..
मुलगी : नाही रागावणार.
वडील : म्हणूनच आधी विचारलं.
मुलगी : पप्पा लग्नाच्या टॉपिकवर काही बोलायचंय का?
वडील : नाही.
मुलगी : मग कशाबद्दल?
वडील : तुझ्या रिल्सबद्दल.
मुलगी : तुम्ही त्यादिवशी रागावल्यापासून, मी एकही रील नाही बनवलं.
वडील : ऐक तर..
मुलगी : काय?
वडील : परवा ऑफिसवरून घरी येत होतो.
मुलगी : मग?
वडील : तेव्हा लोकलमध्ये..
मुलगी : कुणी काही बोललं का?
वडील : माझ्या वयाचे एक गृहस्थ..
मुलगी : त्यांचं काय?
वडील : ते तुझं रील बघत होते.
मुलगी : कोणतं रील?
वडील : तू लग्नाची चौकशी करणाऱ्या काकुंवर बनवलेलं.
मुलगी : मग?
वडील : ते पाहताना ते अचानक खूप जोरात हसले.
मुलगी : विनोदी आहे ना ते रील.
वडील : हो.
मुलगी : पुढे?
वडील : मी त्यांच्याकडे चौकशी केली.
मुलगी : कशाबद्दल?
वडील : हेच तुझ्या रीलबद्दल.
मुलगी : मग?
वडील : तर ते म्हणाले की, आमचं सगळं कुटुंब या पोरीचं फॅन आहे.
मुलगी : काय?
वडील : हो. ते सगळे तुला फॉलो करतात.
मुलगी : खरं सांगताय?
वडील : अगं, खरी गंमत तर पुढे झाली.
मुलगी : म्हणजे?
वडील : मी जेव्हा त्यांना सांगितलं की, तू माझी मुलगी आहे..
मुलगी : मग?
वडील : त्यानंतर त्यांनी माझ्यासोबत सेल्फी काढला आणि व्हिडीओ कॉल लावला.
मुलगी : कुणाला?
वडील : त्यांच्या घरी.
मुलगी : वॉव!
वडील : तेव्हा माझी छाती अभिमानाने फुगली पोरी..
मुलगी : पप्पा.
वडील : दहावीला कमी मार्क मिळाले म्हणून मी तुला मारलेलं.
मुलगी : हो.
वडील : बारावीला नापास झालीस, तेव्हा तुला उपाशी झोपवलं.
मुलगी : पप्पा मी अभ्यास करायचे, मात्र..
वडील : मात्र?
मुलगी : मात्र प्रश्नपत्रिका पाहिली की, काहीच आठवायचं नाही.
वडील : मला आज कळतंय बेटा.
मुलगी : काय?
वडील : सगळेच पोलीस झाले, तर मग कुणीतरी चोर व्हायला पाहिजे.
मुलगी : पप्पा ठेवा फोन.
वडील : मस्करी करतोय पोरे.
मुलगी : अशी मस्करी?
©️अक्षय भिंगारदिवे
वडील : बरं एक सांग?
मुलगी : काय?
वडील : 150K म्हणजे किती?
मुलगी : दीड लाख.
वडील : म्हणजे दीड लाख लोक तुला फॉलो करतात?
मुलगी : हो.
वडील : आम्हाला कधी सांगितलं का नाही?
मुलगी : पप्पा भीती वाटायची.
वडील : कसली?
मुलगी : तुम्हाला हे रील वगैरे बनवणं आवडत नाही.
वडील : अगं पण मला थोडीच माहिती होतं.
मुलगी : काय?
वडील : तू एवढा छान अभिनय करते.
मुलगी : लहानपणापासून मला सिनेमातील हिरॉईनच बनायचं होतं.
वडील : मग?
मुलगी : कधी सांगायचं धाडसच झालं नाही.
वडील : का?
मुलगी : कारण ताईला आणि दादाला कायम चांगले मार्क मिळायचे.
वडील : मग?
मुलगी : आणि मी मंद प्रत्येक परीक्षेत कशीबशी काठावर पास व्हायचे.
वडील : त्यात काय मग?
मुलगी : म्हणून मनात न्यूनगंड..
वडील : तुझ्या आजोबांना जाऊन किती वर्षे झाली?
मुलगी : ९ वर्षे.
वडील : माझं वय किती आहे?
मुलगी : ५८ वर्षे.
वडील : माझा बाप आणि तुझा बाप, अगदी सामान्य आयुष्य जगले.
मुलगी : पप्पा.
वडील : थांब, बोलू दे.
मुलगी : नको.
वडील : आमच्या काळात जेव्हा लोक राजेश खन्ना आणि अमिताभ बच्चनचा ऑटोग्राफ घ्यायचे, तेव्हा..
मुलगी : तेव्हा काय?
वडील : तेव्हा मलाही मनातल्या मनात वाटायचं..
मुलगी : काय?
वडील : आपलेही फॅन्स असावेत आणि त्यांनीही आपल्यासोबत फोटो काढण्यासाठी गर्दी करावी.
मुलगी : मग?
वडील : ते स्वप्न, कायमच स्वप्न राहिलं.
मुलगी : पप्पा..
वडील : आज मात्र तुझ्यामुळे मीही काही क्षण सेलिब्रिटी असण्याचा अनुभव घेतला.
मुलगी : पप्पा तुम्हीही कलाकार आहात. तुमचा तो विनोदी स्वभावच माझ्यात आलाय.
वडील : परवा तुझ्या आईशी बोलत होतो, तेव्हाही ती हेच म्हणाली.
मुलगी : काय?
वडील : नाटकी बापाची, नाटकी पोर.
मुलगी : आईपण ना..
वडील : तुझी आई दहावी आणि मी बारावी शिकलेलो.
मुलगी : हो.
वडील : आम्ही तर त्या फेसबुक अन् इंस्टाचं कधी तोंडही नाही पाहिलं.
मुलगी : तुमची सोशल मीडिया अकाऊंटही नाहीत.
वडील : म्हणूनच तर बोलताना तिला खूप भरून आलेलं पोरी.
मुलगी : का?
वडील : कारण कायमच आम्ही तुला झिडकारलं आणि कमी लेखलं.
मुलगी : जाऊ द्या ना पप्पा.
वडील : तिला जेव्हा मी दीड लाख फॉलोअर्सचा आकडा दाखवला..
मुलगी : काय झालं?
वडील : डोळे डबडबले तुझ्या आईचे.
मुलगी : माझेही.
वडील : ज्या पोरीला आम्ही खोटं नाणं समजायचो, तिनेच..
मुलगी : तिनेच काय?
वडील : स्वतःच्या प्रतिभेने आमचे डोळे दिपवले.
मुलगी : रडवलंत पप्पा.
वडील : नोकरी नव्हती करत म्हणून, तुझी आई तुला झापायची ना?
मुलगी : हो..
वडील : काय म्हणालेली?
मुलगी : किमान १० हजार रुपये तरी महिन्याला कमवून आण.
वडील : म्हणजे वर्षाचे १ लाख २० हजार रुपये.
मुलगी : हो.
वडील : आता पगार किती आहे तुला?
मुलगी : ९ हजार रुपये.
वडील : तुला आठवतंय?
मुलगी : काय?
वडील : तुझ्या लग्नासाठी मी एफडी केलेली?
मुलगी : हो.
वडील : ती आज मी मोडली.
मुलगी : का?
वडील : तुझ्या अकाउंटवर त्यातलेच १ लाख रुपये डिपॉजिट केले आहेत.
मुलगी : का?
वडील : आता दर महिन्याला तुझ्या आईला त्यातले १० हजार रुपये आणून द्यायचे.
मुलगी : म्हणजे?
वडील : आजपासून नोकरी सोड आणि वर्षभर तुला जेवढे रिल्स बनवायचे तेवढे बनव.
मुलगी : खरं?
वडील : हो. पुढचं पूर्ण वर्ष अगदी मनमर्जीने जग.
मुलगी : लग्न?
वडील : लग्न त्यानंतर...
मुलगी : पप्पा का?
वडील : जे तुझ्या बापाला शक्य नाही झालं, ते मिळवून दाखव बेटा.
मुलगी : म्हणजे?
वडील : माझी अपूर्ण राहिलेली स्वप्नं, आता तुला पूर्ण करायची आहेत.
मुलगी : कोणती स्वप्नं?
वडील : आयुष्यात मला तो दिवस पाहायचा आहे.
मुलगी : कोणता?
वडील : ज्यादिवशी लोक मला तुझ्या नावाने ओळखतील.
मुलगी : नक्कीच पप्पा.
वडील : लढ बाप्पू!
मुलगी : पण आपले नातेवाईक आणि शेजारी?
वडील : त्यांचं काय?
मुलगी : त्यांना तर माझं रील बनवणं आवडत नाही. ते तुम्हाला टोमणे मारतील.
वडील : मारू दे टोमणे.
मुलगी : तुमचा अपमान झालेला मला नाही आवडणार.
वडील : पोरी एक गोष्ट कधीच विसरू नको.
मुलगी : कोणती?
वडील : जोपर्यंत तुम्ही संघर्ष करत असता, तोपर्यंतच लोक तुमच्यावर टीका करतात.
मुलगी : म्हणजे?
वडील : म्हणजे जोपर्यंत तुम्ही स्वतःला सिद्ध करत नाही, तोपर्यंत तुम्ही प्रसिद्ध होत नाही.
मुलगी : सहमत.
वडील : आणि एक कायम लक्षात ठेव.
मुलगी : काय?
वडील : टीकाकारांच्या टीकेला उत्तर देण्यापेक्षा, स्वतःचं काम प्रामाणिकपणे करत रहा.
मुलगी : नक्कीच पप्पा.
वडील : कारण..
मुलगी : कारण काय?
वडील : कारण पाठ थोपटणाऱ्या माणसांची गर्दी वाढली, की पाय खेचणारे आपोआप दूर होतात.
मुलगी : ज्जे बात!
©️अक्षय भिंगारदिवे,
८ ऑगस्ट २०२३
कोणत्याही टिप्पण्या नाहीत:
टिप्पणी पोस्ट करा