दररोज उठसूठ 'I LOVE YOU' म्हंटलच पाहिजे असं थोडीचं असतं...
मीठ कमी पडलेल्या भाजीत जराही न मीठ घालता ती भाजी आनंदानं खाणारा तो ILU तर म्हणत असतो. अन त्याच्या आवडीचा पदार्थ त्याने न मागताही आठवणीने बनवून त्याच्या हव्या त्या वेळेला बनवून देताना ती ILU तर म्हणत असते.कधीतरी अचानकपणे आठवणीनं तो तिच्यासाठी गजरा घेऊन येतो, तेंव्हा त्या गजऱ्यात त्याचं ILU लपलेलं असतं ...अन त्याच्या पिकलेल्या केसांना वचवच करत मेंदी लावताना ती तिचं ILU तर चोपडत असते...
'अहो जरा कांदा कापून द्या' असं तिनं हुकूम सोडल्यावर भणभण करत तो कांद्याबरोबर मिरच्या, कोथिंबीरही कापून देतो तेंव्हा त्यांचं ILU त्याच्या डोळ्यातून ओघळत असतं...अन ' आज थालपीठं कर ' असं त्यानं म्हंटल्यावर लगेच चिडून नकार देत थोड्यावेळात गरमागरम थालपीठ ती वाढून आणते तेंव्हा तिचं चमचमीत ILU त्या थालपीठात तर असतं...तिनं न पाळलेली पथ्य आणि वेळेवर न घेतलेली औषधं यावरून तो वाद घालतो तेंव्हा तो ILU तर गुरगुरत असतो...अन त्याच्या सुटलेल्या पोटावर ती जातायेता टोमणे मारता मारता, जेवणातील तेल, मसाला कमी करते तेंव्हा ती ILU ची काळजीचं करत असते...
तिच्या शॉपिंगला नेहमी नावं ठेवताना तिला दोन साड्या आवडल्या तर 'त्या दोन्ही घे' असा आग्रह तो करतो तेंव्हा त्याचं ILU त्या साडीत रेंगाळत असतं...अन त्याच्या अडचणीच्या वेळी ती तिच्या भिशीतून साचवलेले पैसे तणतण करत हळूच काढून देते तेंव्हा ती ILU तर उधळत असते...जाता येता तिला हळूच धक्का देत ओझरता स्पर्श करताना तो तिला चोरटा ILU तर म्हणत असतो आणि त्याने ते तसं केलं तर ते हवंहवंसं वाटूनही त्याच्यावर उगाचंच डोळे वटारते तेंव्हा तिचं ILU लाजतचं असतं...सुट्टीच्या दिवशी तो उशिरापर्यंत शांत झोपला असताना जराही आवाज न करता त्याच्या अंगावर पांघरूण टाकून ती बेडरूमचे दार अलगदपणे लावून घेत बाहेर जाते तेंव्हा ती तिचं ILU तिथेचं त्याच्यापाशी सोडून येत असते... आणि रोज सकाळी ती उठायच्या आत स्वतः पटकन उठून तिच्यासाठी तो चहा बनवतो तेंव्हा त्याचा प्रसन्न ताजाताजा ILU घरभर पसरलेला असतो....
घरात असेच कितीतरी ILU जागोजागी सोफ्यावर, पडद्यावर, टेबलावर, खुर्चीवर, कपाटात, किचनमध्ये, बाल्कनीत, बेडरूममध्ये पडलेले, सांडलेले, लवंडलेले, पसरलेले, विखुरलेले, सुस्तावलेले असतात...आपण फक्त ते टिपायचे अन ओळखायचे असतात.
संकलन : श्री. अर्जुन कृष्णात पाटील
कोणत्याही टिप्पण्या नाहीत:
टिप्पणी पोस्ट करा